Панфилов ауданы тұрғындары «Алматы-Көкпек-Көктал-Қорғас» республикалық маңызы бар автожолының мәселесін жиі көтеріп жүр. Бүгін аудан халқымен кездесуде Қанат Бозымбаев аталған проблеманың шешімі жайлы айтып берді, — деп хабарлайды Алматы облысы әкімінің баспасөз қызметі.
Облыс басшысының айтуынша, қазіргі кезде «ҚазАвтоЖол» облыстық филиалы жол учаскесін орташа жөндеуге техникалық құжаттама әзірлеуде.
«Индустрия және инфрақұрылымдық даму министрінің тапсырмасы бойынша биылдың 31 мамырына дейін Көкталдан Жаркентке дейінгі 14 шақырым жол учаскесі құрылысының құжаттары сараптамадан шығады, сметалық құжаттаманы есептеу жүргізіліп жатыр. Бұл мәселе жуық арада шешіледі», — деді Қ.Бозымбаев.
Жалпы Алматы облысында өткен жылы жолдарды салуға және жөндеуге 47,1млрд. теңге бөлінген, нәтижесінде жақсы және қанағаттанарлық жағдайдағы жолдар 89% құрады, Панфилов ауданында бұл көрсеткіш — 73 %.
Алматы облысы әкімінің баспасөз қызметі.
