Түркістан облысының Полиция департаменті жеке құрамы арасында мәдени-спорттық іс-шараларды дамыту мақсатында жарыс өтті. Іс-шара оқ ату, қол күресі, шағын футболдан ұйымдастырылды.
Полиция қызметкерлерінің денешынықтыру даярлығын нығайту бағытында өткен сайыс тартысты өтті. Нәтижесінде әріптестерінен оза шауып, жеңіске жеткендерге департамент бастығының атынан «Грамота», «Алғыс хат» бағалы сыйлықтары үлестіріліп, сондай-ақ «Динамо» бірлестігінің кубок, медаль және спорттық киімі тарту етілді.
Жүлдегерлер туралы нақтырақ айтсақ, «Макаров тапаншасынан оқ атудан» І орынды полиция аға лейтенанты Хайрулла Жарымбетов, ІІ орынды полиция подполковнигі Азамат Арыстанбаев, ІІІ орынды полиция майоры Бөгенбай Базарқұлов алды.
Ал өзінің күш атасы екенін көрсетіп, қол күресі «Армрестлинг» бойынша жүлделі І орынды полиция майоры Бақытжан Нұрходжаев қанжығасына байлады. ІІ-орын полиция аға лейтенанты Бақдәулет Алимқұловқа, ІІІ орын полиция подполковнигі Марат Смағұловқа бұйырды.
Жасыл алаңда өткен жарыста І орынды Жылдам қимылдайтын арнайы жасақ командасы жеңіп алды. ІІ орынға Арнайы және жұмылдыру даярлығының қызметкерлері өтсе, ІІІ орын «Ардагер» командасына берілді.
Жүзден жүйрік болып, марапатталған полицейлер ұйымдастырушыларға алғыстарын айтып, Қазақстан Республикасына қызмет ететіндіктерін жеткізді.
Түркістан облысы ПД баспасөз қызметі
