Абай облысының қылмыстық-атқару жүйесі департаментінде (ҚАЖД) Наурыз мейрамы кең көлемде аталып өтті. Бұл шараға №19, №20, №21 мекемелері мен пробация қызметінің қызметкерлері белсене қатысты. Көктемнің шуақты мерекесі қазақ халқының ұлттық құндылықтарын насихаттап, ұрпақтан-ұрпаққа жалғасып келе жатқан дәстүрлердің маңыздылығын тағы бір мәрте айқындады.
Мерекелік шара барысында қатысушылар қазақ халқының салт-дәстүрлерін дәріптеп, ұлттық киім киіп, қазақы нақышта безендірілген киіз үйлерде қонақтарды қарсы алды. Шара барысында наурыз көже дайындалып, қатысушыларға ұсынылды.
Ең қызықты сәттердің бірі – ұлттық спорт түрлері мен түрлі сайыстар болды. Қатысушылар асық ату, арқан тарту, қол күрес сынды ойындарда бақ сынасып, ұлттық билер мен әндерді орындады. Сонымен қатар, қазақтың ұлттық тағамдарынан арнайы дастархан жайылып, әр мекеме өздерінің аспаздық шеберлігін көрсетті. Бауырсақ пен бесбармақтан бастап, құрт пен қымызға дейінгі түрлі ұлттық тағамдар көпшіліктің көңілінен шықты.
Мерекелік сайыстардың нәтижесінде №21 мекеме бас жүлдені жеңіп алып, Шуақ ауылы жеңімпаз атанды. Бұл жеңіс – ұжымдық ауызбіршілік пен ұлттық дәстүрлерге деген құрметтің жемісі.
Наурыз мейрамы – тек көктемнің келуін білдіретін мереке ғана емес, сонымен қатар бірлік пен татулықтың, мейірімділік пен жақсылықтың нышаны. Бұл мереке ҚАЖД қызметкерлерін одан әрі біріктіріп, олардың рухани күш-қуатын арттырды.
Наурыз – жаңару мен үміттің мерекесі. Абай облысы ҚАЖД өткізген бұл шара дәстүрлердің өміршеңдігін дәлелдеп, ұлттық құндылықтардың ұмытылмай, болашақ ұрпаққа жетуі үшін маңызды екенін көрсетті.
