Алматы қаласының ҚАЖ департаментінің №11 мекемесінде Ұлы Жеңістің 80 жылдығын мерекелеуге арналған сурет салудан байқау өтті. Іс шараға Жамбыл атындағы қалалық жасөспірімдер кітапханасының қызметкерлерімен бірлесіп, жазасын өтеуші жасөспірімдер арасында патриоттық рухты көтеру және тарихқа деген құрметті арттыру мақсатында сурет байқауы ұйымдастырылды.
Байқауға қатысқан жазасын өтеуші жасөспірімдер, өз туындылары арқылы соғыс жылдарындағы ерлік пен батырлықты бейнелеуге тырысты. Әр суретте майдан даласындағы күрес, тылдағы еңбектің маңызы және Жеңіс күнінің қуанышы көрініс тапты.
Байқаудың мақсаты — жас ұрпақтың бойында отансүйгіштік сезімін қалыптастыру, тарихқа құрметпен қарауға тәрбиелеу және ата-бабаларымыздың ерлігіне деген алғыс сезімін білдіру. Балалар өз туындылары арқылы бейбітшіліктің, батырлықтың және елге деген сүйіспеншіліктің маңызын жеткізді.
Жеңімпаздар мен қатысушылар дипломдармен және естелік сыйлықтармен марапатталды. Ұйымдастырушылар байқауға белсенді қатысқан жазасын өтеуші жасөпірімдерге алғыстарын білдіріп, мұндай шаралар өскелең ұрпақтың шығармашылығын дамытуға және ұрпақтар сабақтастығын нығайтуға ықпал ететінін атап өтті.
