Мемлекеттің басты байлығы – адам. Яғни, біздің еліміз үшін адам құқығы мен бостандығы негізгі құндылық. Бұл құндылықтар көздің қарашығындай қорғалса, халық пен биліктің арасы тығыз болмақ. Сондықтан да Президент Қасым-Жомарт Тоқаев құқық қорғау органдары және құқық қорғау құрылымдары алдын алу шараларына баса мән беруі керектігін үнемі айтып келеді.
Осы орайда «адам құқығы дегеніміз не?» деген сауалға тоқтала кеткен жөн. Адам құқығы – адамның мүддесін қанағаттандыруға бағытталған, заңмен қорғалатын демократиялық құндылық. Адамның құқығы мен бостандығы табиғи және ажырамас егіз ұғым. Мемлекеттің міндеті – адам құқықтарын сақтау, қорғау және мойындау. Мемлекет өзінің азаматтарына жеке адамның қажеттілігіне сәйкес келетін құқық пен бостандықтарды қамтамасыз етуге міндетті. Бүгінде еліміздің әрбір азаматы емін-еркін білім алып, еңбек етіп, ой-пікірін ашық жеткізіп, арман-мақсатын жүзеге асырып келеді. Яғни, Қазақстанда адам құқығына тән белгілердің барлығы қорғалады. Елімізде адам өмірінің қауіпсіздігі, адамның бостандығы мен ар ожданы әр кез сақталады. Мұны ел Президентінің: – Азаматтарымыздың құқығын қорғау саласында кешенді шараларды қолға алдық. Негізгі мақсат – әділетті қоғам құру және соныңарқасында дамудың сара жолына түскен озық ел болу. Сондықтан біз осы бағыттағы маңызды реформаларды жалғастырамыз, жүйелі жұмысты тоқтатпаймыз, – деген сөзінен аңғаруға болады. Дегенмен назар аударатын мәселе де бар. Ақпараттық ресурстардан алшақ жатқан шалғай елді мекендерде адам құқығының бұзылу ықтималдығы жоғары екені анық. Сол үшін де құқық қорғау саласының мамандары ауыл мен қала тұрғындарының мүмкіндігі арасындағы алшақтықты қысқартуға күш салуы тиіс. Сонда ғана Әділетті Қазақстанның жолы айқын, келешегі кемел болмақ. Бүгінде ел билігі ашық әрі әділ саясат жүргізіп отыр. Бұл халықтың сенімді, батыл, ынталы еңбек етуіне жағдай жасайды. Әрі-беріден кейін қазақ елі ұрпағын адал жолмен жүр, біреудің ақысын жеме, ала жіпті аттама деп тәрбиелейтін дана ел. Адамға тән құндылықтарды қастерлейтін елде адам құқығының қорғалуы заңды.
Ерлан БИБАТШАЕВ, Жарма аудандық сотының судьясы АБАЙ ОБЛЫСЫ
