Республикамыздың межелеген мақсаттарының бастысы құқықтық мемлекет құру. Бұл тұрғыда халықтың құқықтық білімі мен мәдениеті, адалдығы, отансүйгіштігі маңызды орын алады. Осы себепті, заңдар мен заңнамалар, т.б. үздіксіз жетілдірілуде. Айтып өтерлігі, азаматтардың құқықтары мен заңды мүдделерін, бостандықтарын қорғауына елімізде заңдық жағынан барлық жағдай жасалған.
Тәуелсіздіктің алғашқы күндерінен-ақ ел азаматтарының құқықтары мен бостандықтарын, заңды мүдделерін қорғауға басымдық беріліп, мемлекетіміздің ең қымбат қазынасы – адам және оның өмірі мен денсаулығы екені Конституцияның 1-бабымен бекітілді. Сонымен қатар, Конституцияның 3-бабында мемлекеттік биліктің – бірден-бір бастауы халық екені айқын жазылды. Елімізде Конституциялық Сот, дербес Кассациялық соттар жұмыс істейді. Мысалы, азаматтар өздерінің құқықтары немесе бостандықтарын қорғау жолында Конституциялық Сотқа тікелей шағымдана алады. Бұл халық үшін зор мүмкіндік.
Конституция талаптарын жүзеге асыру мақсатында жасалып жатқан реформалар нәтижесіз емес. Мәселен, «Халық үніне құлақ асатын мемлекет» тұжырымдамасы Қазақстан азаматтарының саяси шешімдер қабылдау процесіне кеңінен қатысуына жол ашты, сондай-ақ, саяси басқарудың теңгерімді жүйесі, есеп беретін Үкімет пен ашықтық қағидаттары, т.б. игі істер қоғамымызда заң мен тәртіпті орнықтыруда айрықша маңызға ие. Айтып отырған өзгерістер еліміздің басты ұстанымы – Әділетті Қазақстан құру, Заң мен тәртіп қағидатын жүзеге асыру жолындағы нақты қадамдардың бастысы ретінде бағаланады.
