Ұлттық қауіпсіздік комитеті 4 ақпанда Қызылордада есірткі заттарын сақтау мен сұрыптауға қатысы бар үш азаматтың заңсыз әрекетін анықтады, — деп хабарлайды Tengrinews.kz тілшісі ҰҚК баспасөз қызметіне сілтеме жасап.
«Процессуалдық іс-шаралар барысында «гидропоника» әдісімен өсірілген 24 түп апиын көкнәрі, 2 түп сора және 2 келі кептірілген марихуана алынды», — делінген хабарламада.
Сондай-ақ, 2022 жылғы 8 ақпанда Қарағанды облысында өңірлік есірткі тобының өкілдері ұсталған. Олардың екеуі Саран қаласының тұрғыны.
«Топтың есірткі заттарын Қазақстанның оңтүстік өңірлерінен тасымалдап, Нұр-Сұлтан, Қарағанды, Теміртау және Саран қалаларында өткізгені анықталды. Қабылданған шаралар нәтижесінде 6 келі гашиш пен 52 келі марихуананың заңсыз айналымға түсуіне жол берілмеді», — делінген хабарламада.
Соталды тергеу материалдары ҚР ҚК-ның 297-бабы 3-бөлігі бойынша СТБТ-ға тіркелген.
Бұған дейін Ұлттық қауіпсіздік комитеті Алматыда психотроптық заттарды заңсыз дайындаған есірткі зертханасын жойғаны хабарланған болатын. Заңсыз айналымнан шамамен 9 келі мефедрон және α-PVP психотроптық заттары алынған. Олардың қара нарықтағы құны 149 миллион теңгеге бағаланған.
