Түркі мәдениеті және мұрасы қорының Президенті Ақтоты Райымқұлова Польшаға ресми сапары аясында Польша Республикасының Сенаты вице-маршалы Михал Каминскиймен кездесті. «Әдебиет және көркемөнер» порталы таратқан ақпарат бойынша Түркі мәдениеті және мұрасы қоры делегациясының Польшаға барған сапары ынтымақтастық кездесулерге толы болған. Сапар аясындағы кездесулердің бірі түркі әлемі мен Польша арасындағы мәдени байланыстарды дамыту, бірлескен жобаларды іске асыру және мәдени мұраны сақтау бағытында ынтымақтастық мәселелері талқыланған.
Түркі мәдениеті және мұрасы қоры Президенті Ақтоты Райымқұлова Қордың түркі әлемінің мәдени және тарихи мұрасын сақтау мен насихаттау саласында атқарған жұмыстары, сондай-ақ Польшамен осы бағыттағы ықтимал ынтымақтастық перспективалары туралы ақпарат берді.
Польшада тұратын түркі тектес қауымдастықтар – татарлар мен қарайымдардың мәдени мұрасын сақтау және зерттеу саласында бірлескен бастамаларды жүзеге асырудың маңыздылығын атап өтті. Сенаттың вице-маршалы Михал Каминский Польша тарихи және мәдени мұраны сақтауға үлкен мән беретінін атап өтіп, түркі әлемімен мәдени алмасуды дамытудың аясында ынтымақтаса жұмыс жасауға ниетті екендігін атап өтті.
Кездесуге Әзербайжан Республикасының Польша Республикасындағы Елшісі Нәргіз Құрбанова және Қазақстан Республикасының Польша Республикасындағы Елшісі Әлім Кірабаев қатысқан. Кездесу тараптарды қызықтырған өзге мәселелер бойынша талқылаулармен жалғасты.
