Күйеуі үйлену тойын өткізу кезінде достары мен туыстары жауапкерге (жұбайына) 5 млн. теңге және 1 млн. теңге тұратын гауһарлы әшекейлер (сырға мен сақина) мен неке жүзігін бергенін айтып, мүлікті бөлу туралы талаппен жүгінген.
Талап қоюшы жауапкер бұл ақша мен зергерлік бұйымдарды заңсыз иемденген деп уәжедеген.
Жауапкер талапты мойындамады.
Сот іс материалдарын зерделеп, тараптарды тыңдап, талап қоюды қанағаттандырудан бас тарту туралы шешім қабылдады.
Себебі, істі қарау барысында сыйға берілген 5 млн. теңгені алу фактісі құжатпен расталмады, сондай-ақ аталған қаражатты жауапкердің иемденіп алғаны дәлелденбеді.
Зергерлік бұйымдарға келетін болсақ, ол қалыңдыққа некеге дейін берілген, сондықтан бұл оның жеке меншігі, сол себепті ол бөлісуге жатпайды.
«Неке (ерлі-зайыптылық) және отбасы туралы» Кодекстің 35-бабына сәйкес:
— ерлі-зайыптылардың әрқайсысына некеге (ерлі-зайыптылыққа) дейін тиесілі мүлік;
— ерлі-зайыптылардың неке (ерлі-зайыптылық) кезеңінде сыйға тарту тәртібімен немесе өзге де өтеусіз мәмілелер бойынша алған мүлкі ерлі-зайыптылардың әрқайсысының жеке меншігі болып табылады.
Астана қаласының кәмелетке толмағандардың істері жөніндегі мамандандырылған ауданаралық соты
