Нұр-Сұлтан уақыты бойынша сағат 18.00-дегі аладын ала мәлімет бойынша, Қазақстандағы референдумға сайлаушылардың қатысу көрсеткіші 65,04 пайыз болды. Бұл туралы Орталық сайлау комиссиясының мүшесі Шавкат Өтемісов мәлімдеді, — деп хабарлайды Tengrinews.kz тілшісі.
Сағат 18.00-дегі жағдай бойынша референдумда 7 миллион 624 мың 641 қазақстандық дауыс берді.
«Орталық референдум комиссиясының облыстар, республикалық маңызы бар қалалар және елордадағы аумақтық комиссиялары берген мәлімет бойынша, астана уақыты бойынша сағат 18.00-де тізімге енгізілген азаматтардың жалпы санының 65,04 пайызы сайлау бюллетендерін алды», — деді Өтемісов.
Еске салайық, бүгін, 5 маусымда Қазақстанда республикалық референдум өтіп жатыр.
Референдумда қазақстандықтар Конституциядағы түзетулердің болу не болмауына дауыс береді. Яғни бюллетенде тек бір сұрақ: «Қазақстан Республикасының Конституциясына өзгерістер мен толықтырулар енгізу туралы» заң жобасында баяндалған Қазақстан Республикасының Конституциясына түзетулер мен толықтыруларды қабылдайсыз ба?». Сұраққа «иә» не «жоқ» деп жауап беруі керек.
