Түркістан облысы ПД Ұйымдасқан қылмысқа қарсы күрес басқармасының қызметкерлері ірі көлемде заңсыз оқ-дәрілер сату, сақтау қылмысының жолын кесті. Нақтырақ айтсақ тәртіп сақшылары жедел-іздестіру іс-шаралары кезінде, облыс орталығында заңсыз оқ-дәрі сататын дүкенді анықтады.
Жедел уәкілдер сауда дүкеніне қатысты тиісті ақпараттар жинақтап, тінту жұмыстарын жүргізді. Нәтижесінде күдікті ретінде оқ-дәрілерді сатып, сақтаумен айналысатын 1 ер адам, 1 әйел анықталды. Ал олар жұмыс жасаған дүкеннен 2000-ға жуық оқ-дәрілер тәркіленді. Оның ішінде 990 данасы 16 калибрлі аңшылық мылтыққа арналған болса, 15 келі бытыра және 1 дана глушитель, сонымен қатар дүкен қоймасынан 12 қорапта жалпы 925 дана оқ алынды. Сатушы әйелдің үйінен «VALTRO – COMBAT» маркалы газдық тапанша тәркіленді.
Аталған жайт ҚР ҚК-нің 287-бабы 4-бөлігі «Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру» бойынша тіркелді. Баллистикалық сараптама тағайындалды. Қазіргі уақытта сотқа дейінгі тергеу амалдары жүргізілуде.Түркістан облысы ПД баспасөз қызметі
