Қазақстан Республикасының сот жүйесінде кассациялық сот өндірісі сот актілерінің заңдылығы мен негізділігін тексеруді қамтамасыз ететін маңызды процессуалдық тетік болып табылады. Кассациялық сатының негізгі мақсаты – төмен тұрған соттармен жол берілген құқық қолдану қателіктерін жою және заңнаманың біркелкі қолданылуын қамтамасыз ету.
Кассациялық сот – бірінші және апелляциялық сатыларда қаралған істер бойынша заңды күшіне енген сот актілерін кассациялық тәртіппен қайта қарайтын сот сатысы. Кассациялық соттың қызметі Қазақстан Республикасының Конституциясына, сондай-ақ Азаматтық процестік кодексіне, Әкімшілік рәсімдік-процестік кодексіне және Қылмыстық-процестік кодексіне сәйкес жүзеге асырылады.
Кассациялық соттың негізгі міндеттері мыналар болып табылады:
- материалдық және процестік құқық нормаларының дұрыс қолданылуын қамтамасыз ету;
- сот тәжірибесінде заңнаманың біркелкі қолданылуын қалыптастыру;
- сот актілеріндегі заң бұзушылықтарды жою;
- азаматтардың, заңды тұлғалардың және мемлекеттің бұзылған құқықтары мен заңды мүдделерін қорғау.
Кассациялық сот істерді қайтадан мәні бойынша қарамайды және жаңа дәлелдемелерді, заңда көзделген жағдайларды қоспағанда, зерттемейді. Істі қарау барысында сот:
- сот актісінің заң талаптарына сәйкестігін;
- соттардың құқық нормаларын дұрыс қолдануын;
- процестік нормалардың сақталуын
тексереді.
Кассациялық шағымды іске қатысушы тараптар, олардың заңды өкілдері, прокурор беруге құқылы. Кассациялық шағым заңнамада белгіленген мерзімде және нысанда беріліп, онда сот актісін қайта қарауға негіз болатын дәлелдер мен уәждер нақты көрсетілуі тиіс.
Кассациялық сот өндірісі сот төрелігін жүзеге асырудың маңызды кепілі болып табылады. Ол заңдылық қағидатын қамтамасыз ете отырып, сот жүйесінің тиімділігін арттыруға және азаматтардың сотқа деген сенімін нығайтуға ықпал етеді. Кассациялық соттың қызметі құқықтық мемлекеттің негізгі қағидаттарын іске асыруда айрықша мәнге ие.
Қызылорда қалалық сотының судьясы К.А.Садуақасова
