Шардара аудандық полиция бөліміне жергілікті тұрғын арызданып, танысының үйіне барып тұрған сәтінде көлігінің алдыңғы бөлігін «ВАЗ 2107» соққанын хабарлады.
Оқиға орнына шұғыл шыққан полицейлер күдікті көлік жүргізушісі, жәбірленушінің жол жиегінде тұрған «Ауди 100» көлігін соға отырып, бөтен біреудің қоршауын бұзып, зақым келтіргенін анықтады. Сондай-ақ полицейлер «ВАЗ» автокөлігін басқарған жүргізушінің құжатын тексеру барысында, оның мас халде екенін білді. Тағайындалған зерттеу оның ішкенін, әрі есірткі тұтынғанын растады.
Тексеру кезінде тіпті күдікті ер адамның бұған дейін 2022 жылдың мамыр айында ішімдік ішіп, көлік тізгіндегені үшін Астана қаласы сотының шешімімен 7 жылға көлік жүргізу құқығынан айырылып, 15 тәулікке қамалғаны белгілі болды.
Қазіргі таңда жаза арқалағанына қарамастан, қайта мас халде көлік басқарған жүргізушіге ҚК-нің 346-бабы «Көлік құралдарын басқару құқығынан айырылған және алкогольдік, есірткілік және (немесе) уытқұмарлық масаң күйдегі адамның көлік құралын басқаруы, сол сияқты көлік құралын басқаруды осындай адамға беру немесе көлік құралын осындай адамның басқаруына жол беру» бойынша тергеу амалдары жүргізілуде. Күдікті қамауда.
Түркістан облысының полицейлері мас күйінде рульге отырмауға кеңес беріп, мұның соңы орны толмас қайғыға әкелуі мүмкін екенін қатаң ескертеді.
Түркістан облысы ПД баспасөз қызметі
