Түркістан қалалық полиция басқармасына облыс орталығының тұрғыны 19 жасар ұлының жоғалып кеткені туралы арызданды. Қала тұрғыны жоғалған баласын өз бетінше іздегенімен, нәтиже болмай, полицияның көмегіне жүгінеді.
Полицейлер бұл жайтты бірден тіркеп, жоғалған баланы іздеуге кірісті. Қажетті іс-шараларды жүргізіп, куәлардан жауап алып, жас жігіттің баруы мүмкін жерлерді тексерді.
Түркістандық тәртіп сақшылары бірнеше күн бойы атқарған жұмыстардың нәтижесінде, жоғалған жас жігітті Шымкент қаласындағы көлік жуу орындарының бірінен жұмыс істеп жүрген жерінен тапты. Анықталғандай, ол отбасылық жанжалға байланысты үйінен кетіп қалған. Полицейлердің кәсіби шеберлігі арқасында ұлы аман-есен табылған ана: - «Мен ұлымның жоғалуына байланысты полиция бөліміне хабарластым. Бүгін менің балам табылып, үйге оралды. Полицейлерге көп рахмет!» – деп өзінің шынайы ризашылығын жеткізді. Түркістан облысының полицейлері азаматтарға қырағы болуға және балаларын қараусыз қалдырмауға кеңес береді. Егер сіздің туысыңыз немесе балаңыз жоғалған жағдайда, 102 телефоны бойынша тез арада полицияға хабарласыңыз.Түркістан облысы ПД баспасөз қызметі
