«Chevron» компаниясының Бас директоры Майкл Вирт ҚР Президенті Қасым-Жомарт Тоқаевқа жолдаған хатында қазақстандықтарға қолдау білдірді.
«Қазақстанның байырғы досы және серіктесі ретінде, біз «Chevron»-да өткен аптада болған оқиғаларға қайғырып, Сізге және Қазақстан халқына көңіл айтамыз. Біздің ойларымыз осы қиын-қыстау кезеңде Қазақстан халқымен бірге және біз Қазақстанға қазіргі қиыншылықтарды тезірек еңсеруге деген ізгі тілектерімізді жолдаймыз», — деді ол.
М. Вирт еліміздегі компания кәсіпорындарының персоналына ерекше көңіл бөлді: «Қазақстандағы қызметкерлеріміздің қауіпсіздігі мен амандығы басымдығымыз болып қалуда. Біз Теңізде тұрақты, қауіпсіз және сенімді жұмысты қамтамасыз ету үшін барлық күш-жігерімізді салуды жалғастырамыз және «Теңізшевройл» қызметкерлеріне өз ісіне адалдығы үшін алғысымызды білдіреміз».
Хаттың көшірмесі Қазақстан Республикасының Америка Құрама Штаттарындағы Елшісі Ержан Ашықбаевтың Туиттердегі парақшасында жарияланды. Дипломат «Chevron» Бас директорына қолдау көрсеткені үшін алғыс айтып, елдің үкіметі инвесторлардың Қазақстанның экономикалық тұрақтылығына деген сенімін сақтау үшін барлық мүмкін шараларды қабылдайтынына сендірді.
