Талдықорғандағы ең ескі әрі тозығы жеткен жылу желілерінің бірі жаңа жылыту маусымына толық дайын болды. Жансүгіров көшесінде 1980 жылдан бері пайдаланылып келген және 61%-ға тозған 3,5 км құбыр толығымен ауыстырылды. Бұл магистральға 246 ғимараттың жылуы тікелей байланысты. Соның ішінде 66 көпқабатты үй, 136 жеке баспана, сондай-ақ мектептер, балабақшалар мен ауруханалар бар.
Құны 6,8 млрд теңгені құрайтын жоба «Энергетикалық және коммуналдық секторларды жаңғырту» ұлттық жобасы аясында жүзеге асырылды. Жаңартылған учаске Талдықорғанның негізгі жылу магистралін кезең-кезеңімен қайта жаңарту бағдарламасына кіреді.
Жұмыстардың аяқталуы қалалық жылу жүйесіндегі ең түйткілді тұстардың бірін жоюға мүмкіндік берді. Жаңадан жаңартылған учаске қысқы ең жоғары жүктемелерге дайын, бұл апаттық жөндеулер мен жылудың өшіп қалу қаупін азайтады.
«Біз үшін ескі құбырларды ауыстырып қана қоймай, желіні пайдалану тәсілінің өзін өзгерту маңызды болды. Қашықтан бақылау жүйесі оқшаулағыштың күйін қадағалап, ықтимал зақымдануларды ерте кезеңде анықтауға мүмкіндік береді. Бұл салдарымен күреспей, күрделі ақаулардың алдын алуға жол ашады», — деді «Талдықорғанжылусервис» ШЖҚ КМК директоры Абзал Жағыпаров.
Сонымен қатар, Талдықорғанда Біржан сал көшесіндегі ұзындығы 1 шақырым болатын жылу желілерінің тағы бір учаскесін жаңғырту жалғасуда. Қазіргі кезде нысанның дайындығы 86%-ды құрайды. Жұмыстарды жылу беру маусымы басталғанға дейін аяқтау жоспарланған.
Іске қосылғаннан кейін Біржан сал көшесіндегі жаңартылған желі тағы 189 нысанды тұрақты жылумен қамтамасыз етеді. Олардың қатарында 54 көпқабатты үй, 114 жеке баспана, екі мектеп, үш балабақша және медициналық мекеме бар.
Сонымен, бұл екі жоба қаладағы 435 нысанды қамтиды. Оларды жүзеге асыру жоспардан тыс өшіру қаупін азайтып, Талдықорғанның тұрғын үйлері мен әлеуметтік мекемелеріне жылудың тұрақты берілуін қамтамасыз етеді.
Қаланың негізгі жылу магистралін жаңғырту 2027-2028 жылдары да жалғасады. Жалпы алғанда, 8,7 шақырым магистральдық желіні қайта жаңарту көзделген. Келесі кезеңдерде тек қазақстандық өнімдерді пайдалану жоспарланып отыр.
