Алғыс айту күні қарсаңында Абай облысы бойынша қылмыстық-атқару жүйесінің орташа қауіпсіздік мекемесінің қызметкерлері Семей қаласындағы абаттандыру саласының жұмысшыларына және сауда-ойын-сауық орталықтарының тазалық қызметкерлеріне ризашылықтарын білдірді.
Қазіргі таңда Семей қаласында аязды күндер орнап, ауа температурасы 30 градустан төмендеуде. Қатал ауа райы жағдайына қарамастан, коммуналдық қызмет қызметкерлері көшелерді қардан тазарту, жол қозғалысының қауіпсіздігін қамтамасыз ету және санитарлық тәртіпті сақтау бойынша күнделікті жұмыстарын жалғастыруда.
Олардың еңбегіне құрмет көрсету мақсатында орташа қауіпсіздік мекемесінің қызметкерлері арнайы кездесу ұйымдастырып, алғыс пен қолдау сөздерін жеткізді. Еңбек адамдарына ыстық шай, жаңа піскен тәтті тоқаштар мен тәттілер ұсынылып, бұл аязды күні көрсетілген жылы ықылас болды.
— Қатты аязда ашық ауада жұмыс істеу үлкен төзімділік пен жауапкершілікті талап етеді. Біздің еңбегімізден қала тұрғындарының қауіпсіздігі мен жайлылығы байланысты екенін түсінеміз. Еңбегіміздің бағаланғаны қуантады, — деді абаттандыру қызметкері.
Сондай-ақ адамдар көп шоғырланатын орындарда тазалық пен тәртіпті қамтамасыз етіп жүрген сауда-ойын-сауық орталықтарының тазалық қызметкерлеріне де ерекше алғыс айтылды.
— Алғыс айту күні бізге қарапайым, бірақ маңызды құндылықтарды — еңбек адамдарына деген құрмет пен ризашылықты еске салады. Осындай аязды күндері таңнан бері жұмыс орнында жүрген жандарды қолдағымыз келеді. Олардың еңбегі — әрбір қала тұрғынының жайлылығы мен қауіпсіздігіне қосылған үлес. Біз олардың табандылығы мен жауапкершілігі үшін шын жүректен алғыс білдіреміз, — деді мекеме бастығының орынбасары Сапарғалиев Нұрболат.
Іс-шара соңында ерекше көзге түскен қызметкерлерге алғыс хаттар табысталды. Өткізілген акция жұмысшы мамандық иелеріне деген құрметтің көрінісі болып, күрделі ауа райы жағдайында қаланың санитарлық тазалығы мен абаттандырылуын қамтамасыз етудегі олардың күнделікті еңбегінің маңыздылығын тағы бір мәрте айқындады.
