Сыбайлас жемқорлық – қоғамның дамуына кедергі келтіретін ең қауіпті құбылыстардың бірі. Ол мемлекеттің беделін түсіріп, халықтың билікке деген сенімін әлсіретеді, әділдік пен заң үстемдігіне нұқсан келтіреді. Сондықтан сыбайлас жемқорлыққа қарсы күрес – баршамыздың ортақ міндетіміз.
Жемқорлықтың түрі көп: пара алу мен беру, қызмет бабын пайдалану, таныстықпен жұмысқа орналастыру, заңды бұзып пайда табу – мұның бәрі қоғамның дамуын тежейді. Әрбір азамат мұндай әрекеттерге төзбеушілік танытып, әділдік пен адалдықты басты қағида етуі қажет.
Бүгінгі таңда елімізде сыбайлас жемқорлықтың алдын алу бағытында көптеген жұмыстар жүргізілуде. Мемлекеттік қызметшілердің жауапкершілігін арттыру, ашықтық пен жариялылықты қамтамасыз ету, цифрландыру жүйесін дамыту – жемқорлықтың азаюына ықпал ететін маңызды шаралар. Бірақ ең бастысы – қоғамдағы сана өзгеруі керек. Әрбір адам адал еңбек ету мен әділ болудың қадірін түсінгенде ғана жемқорлық жойылады.
«Адалдық – ардың ісі» дейді халқымыз. Сондықтан біз, жас ұрпақ, ел болашағы үшін әділдік пен тазалықты өмірлік ұстаным етуіміз қажет. Тек сонда ғана «Сыбайлас жемқорлыққа жол жоқ!» деген ұран шынайы өмір қағидасына айналады.
Түркістан облысының кәмелетке толмағандардың істері жөніндегі мамандандырылған ауданаралық сотының судьясы С. Абсаматов
