Түркістан облысының экономикасында ауыл шаруашылығы саласының алатын орны зор. Мұнда өңір халқының тең жартысынан астамы ауылдық жерде тұрады. Сондықтан агроөнеркәсіптік кешенді дамытуда ауыл шаруашылығы техникасын жаңарту маңызды рөл атқарады.
Мемлекет басшысы да «Ауыл шаруашылығы еңбеккерлерінің» бірінші форумында ауыл шаруашылығы техникаларын жаңарту деңгейін жылына 8-10 пайызға дейін жеткізуді міндеттеген еді. Түркістан облысы әкімдігінің баспасөз қызметінің мәліметі бойынша, өңірде 3 мың ауыл шаруашылығы техникаларының пайдалану мерзімі 20 жылдан асқан. Сол себепті алдағы 5 жылда ауыл шаруашылығы техникалары паркін 35 пайызға жаңарту жоспарланып отыр. Бұл мәселенің түйінін тарқату үшін шаруашылық техникаларын шығаратын жаңа өндіріс орнын ашу қарастырылуда. Ол «Агромашхолдинг» АҚ-ның президенті Динара Шүкіжанованың Түркістан облысының әкімі Нұралхан Көшеровпен кездесуінде де сөз болды. Өңірде инвестициялық жобаларды жүзеге асыру мәселесін талқылау кезінде ауыл шаруашылығы техникасын шығаратын зауыт ашу жөнінде келіссөз жүргізілді. – Түркістан облысы – аграрлы аймақ. Ауыл шаруашылығы техникаларына сұраныс өте жоғары. Сондықтан арнайы зауыт пен сервистік орталықты өңірімізден ашу тиімді болады. Арнайы ғимарат, жер және инфрақұрылым бойынша толық қолдау көрсетіледі. Бірлесе жұмыс істеуге дайынбыз, – деді Нұралхан Көшеров. Ал Динара Шүкіжанованың айтуынша, онда АҚШ пен Қытайдың да үлгілері қолданылмақ. Бұл үшін алдымен мамандар өндірістік паркпен танысып, жаңа өндіріс орнын ашу мәселесі бойынша зерттеу жүргізіп, олардың сараптамасы негізінде нақты шешім қабылданатын болады.
Ерлік ЕРЖАНҰЛЫ, «Заң газеті»
