Биыл Кеңес әскерінің Ауғаныстан жерінен шығарылғанына 36 жыл толды. Бұл күні Ауған соғысында ерлік көрсетіп, құрбан болған жандардың есімі ардақталып, рухына тағзым етіледі.
Соған орай бүгін №60 мекеменің сотталғандар арасында әлеуметтік психологиялық тәрбие жұмыстары бөлімі қызметкерлері мен №6 кешкі мектеп мұғалімдері бірлесіп, Ауған соғысы ардагерлерін еске алу бағытында сотталғандар арасында спорттық іс-шара ұйымдастырды.
Іс шараның мақсаты Ауған соғысына қатысқан ардагерлердің ерліктерін дәріптеу, соғыс қасіретін ұғындыру, отан қорғаудағы азаматтардың міндетін асқақтату.
Мерекелік күндерге байланысты мұндай спорттық шаралар жиі өткізіледі. Өйткені, сотталған азаматтардың салауатты өмір салтын ұстанып, қоғамдық жұмыстарға белсене араласып, түзелу жолына түсуіне берері мол. Осындай іс-шаралар, оларға серпін беріп, алдағы уақытта қателікке бой алдырмай, қоғамда өз орны бар мемлекетіміздің азаматы болып шығуына игі әсері бар.
Іс—шара барысында шахмат, чашка, гир көтеру сынды ойындардан жарыс өткізіліп, сотталғандар жарысқа белсеніп, қызығушылықпен қатысты.
«Он жылға созылған соғыста қайтпас қайсарлық, беріспес батылдықтың ерен үлгісін көрсеткен жауынгерлеріміздің біразы туған жеріне оралмады. Сол тұстағы жас жігіттер жауынгерлік, азаматтық борышына адалдық танытып, ауған даласында қайсарлық пен қаһармандықтың үлгісін көрсетті. Біздің жауынгерлер үшін де үлкен өмір сынағы болды.Жалындап тұрған жас шағында мыңдаған азаматтар жат елде жан тапсырып, тірі қалғандар майданнан түрлі жарақатпен оралды. Осындай орны толмас қасіреттерге толы күндер ел есінен мәңгі ұмытылмайды. Отан алдындағы азаматтық борыштарымызды абыроймен атқарып, елімізге адал қызмет етейік.-деді тәрбие жұмыстары бөлімінің бастығы Абдолла Нағашыбекұлы қорытынды сөзімен.
Шара соңында соғыс жылдары қаза тапқан батыр ардагерлерге тағзым етілді.
