Жалағаш аудандық пробация қызметінің есебіндегі азаматтар Мұқағали Мақатаев көрмесіне қатысты
Жалағаш ауданында пробация қызметінің есебінде тұрған азаматтар үшін тағылымды шара ұйымдастырылды. Олар қазақ поэзиясының ақиық ақыны Мұқағали Мақатаевтың шығармашылығына арналған көрмеге барып, ақынның өмірі мен әдеби мұрасымен жақын танысты.
Іс-шара Жалағаш аудандық кітапханасында өтті. Көрмеде Мұқағали Мақатаевтың әр жылдары жарық көрген кітаптары, сирек фотосуреттері, сондай-ақ ақынның өз қолымен жазған өлеңдері мен хаттарының көшірмелері қойылды. Кітапхана қызметкерлері ақынның шығармашылығы туралы қызықты деректермен бөлісіп, оның қазақ әдебиетіндегі маңызын ерекше атап өтті.
Шара барысында пробация есебіндегі азаматтар Мұқағали Мақатаевтың өлеңдерін оқып, оның шығармашылығы жайлы ойларымен бөлісті. Көпшілігі ақынның жырларын жас кезінен сүйіп оқығандарын айтып, оның поэзиясы жүректерінде ерекше орын алатынын жеткізді.
Мұндай мәдени шаралар пробация қызметінің есебінде тұрған азаматтардың қоғамға бейімделуіне, әдебиетке деген қызығушылығын арттыруға ықпал етеді. Жалағаш аудандық пробация қызметінің қызметкерлері алдағы уақытта да осындай танымдық кездесулер ұйымдастырып, азаматтардың рухани және мәдени дамуына үлес қосуды жалғастыруды жоспарлап отыр.
