Қызылорда қалалық пробация қызметі есебіндегі сотталғандар арасында спорттық іс-шаралар тұрақты түрде ұйымдастырылып келеді. Бұл шаралардың негізгі мақсаты – оларды қоғамға пайдалы әрекеттерге тарту, денсаулықтарын нығайту және спортқа деген қызығушылықтарын арттыру.
Осы бағытта Қызылорда облыстық №5 олимпиадалық резервтің мамандандырылған балалар-жасөспірімдер спорт мектебімен бірлесіп, 14-18 жас аралығындағы пробация есебіндегі жасөспірімдерге дзюдо спортын үйрету мақсатында арнайы іс-шара өткізілді. Жаттығу барысында жасөспірімдерге дзюдоның негізгі әдіс-тәсілдері үйретіліп, спорттың тәртіп пен шыдамдылыққа баулитын қырлары таныстырылды.
“Дзюдо тек спорт емес, ол тәртіп пен өз-өзіңе сенімділік сыйлайды. Дзюдоны жақсы көремін, спортпен шұғылданған өте пайдалы. Енді мұнда жиі келіп тұратын боламын. Бізге осындай мүмкіндік берген пробация қызметі мен жаттықтырушыларға алғысым шексіз,-деді есептегі жасөспірім.
Алдағы уақытта Қызылорда қалалық пробация қызметі өз есебіндегі сотталғандар үшін басқа да спорттық іс-шараларды ұйымдастыруды жоспарлап отыр. Бұл бастамалар олардың әлеуметтік ортаға қайта бейімделуіне және салауатты өмір салтын ұстануына көмектесетін маңызды қадам болмақ.
