Қазақстанның жоғары оқу орындарының ішінде ерекше орны бар әл-Фараби атындағы Қазақ ұлттық университеті (ҚазҰУ) еліміздің білім беру жүйесінің флагманы ретінде танылған. Бүгінде ҚазҰУ тек Қазақстанда ғана емес, халықаралық аренада да сапалы білім беруімен, ғылыми зерттеулерімен және инновациялық жобаларымен мақтана алады.ҚазҰУ-дың басты мақсаты – білім алушыларға терең теориялық білім беріп қана қоймай, олардың заманауи еңбек нарығындағы сұранысқа ие кәсіби дағдыларын дамыту. Университет әлемдік білім беру стандарттарына сәйкес білім беру бағдарламаларын әзірлеп, цифрлық технологияларды оқыту процесіне белсенді енгізіп келеді.Жыл сайын ҚазҰУ-да жүздеген маман жоғары сапалы білім алып, қоғамның әртүрлі салаларында табысты еңбек етуде. Университеттің түлектері мемлекетіміздің дамуына үлес қосып, ел болашағын айқындайтын көшбасшыларға айналуда.
ҚазҰУ – тек білім беру ордасы ғана емес, ғылыми ізденістердің негізгі орталығы. Университет қабырғасында жыл сайын жүздеген ғылыми жоба іске асырылып, олардың көпшілігі халықаралық деңгейде мойындалады. Бұл жобалар жастардың ғылыми әлеуетін дамытуға және заманауи ғылымды өркендетуге бағытталған.Сонымен қатар, университетте инновациялық жобаларға арналған стартап-инкубаторлар мен зертханалар жұмыс істейді. Бұл орталықтар студенттер мен жас ғалымдарға өз идеяларын жүзеге асыруға мүмкіндік береді.ҚазҰУ әлемнің 100-ден астам университетімен әріптестік байланыс орнатып, студенттерге шетелде білім алуға немесе тағылымдамадан өтуге жағдай жасайды. Мұндай ынтымақтастық студенттердің мәдени және кәсіби тұрғыда дамуына, әлемдік көзқарасын кеңейтуіне септігін тигізеді.
Қазіргі таңда сапалы білім беру жолында заң факультетінің кеден, қаржы және экологиялық құқық кафедрасының профессорлық-оқытушылар құрамы аянбай еңбек етуде. Кафедра дайындайтын мамандықтардың оқу бағдарламалары жоғарғы білім беру сапасын арттырып,білікті мамандар санын көбейтуде. Факультет миссиясы-қазіргі еңбек нарығының талаптарына сәйкес келетін,құқықтану саласында кәсіби құзыреттілікке ие, көзқарастар мен құндылықтарға сай жаңа буындағы заң кадрларын қалыптастыру,мықты маман дайындау. Білім беру бағдарламалары бойынша маман даярлау жоғары білікті профессорлар мен оқытушылар арқылы жүзеге асырылады. Факультетте студенттердің шығармашылық әлеуетін іске асыру үшін барлық жағдай жасалған. Кафедраларда студенттік ғылыми үйірмелер жұмыс істейді. Факультет студенттері жыл сайын университетте өткізілетін ғылыми-практикалық конференцияларға, сондай-ақ республикалық және аймақтық конференцияларға, олимпиадаларға, конкурстарға белсенді қатысады.
ҚазҰУ – еліміздің жарқын болашағының кепілі. Бұл университеттің қабырғасында алынған білім мен тәжірибе жастарды биік белестерге жетелеп, олардың кәсіби және тұлғалық дамуына жол ашады. Әл-Фараби атындағы Қазақ ұлттық университеті сапалы білім беру мен ғылымды дамыту арқылы Қазақстанның болашағын жарқын етуге өз үлесін қосуда.
Рахметов Е.Ш
әл-Фараби атындағы ҚазҰУ-дың заң факультеті кеден, қаржы және экологиялық құқық кафедрасының оқытушысы
Гуо Я
әл-Фараби атындағы ҚазҰУ-дың заң факультеті кеден, қаржы және экологиялық құқық кафедрасының білім алушысы
