Абай облысындағы қауіпсіздігі аралас колониясының тексеру бөлмесінде тыйым салынған заттың жолы кесілді. Қауіпсіздігі аралас мекеменің тәртіп бөлімінің тексеру тобы қызметкерлерімен, күзетілетін аймаққа кіргізбек болған ақша тәркіленді. Ұрлық жасағаны үшін жазасын өтеп жатқан сотталғанға, қысқа мерзімді кездесуге келген досынан, сол жақ шұлығына тығып қойған 5000 теңге ақша тәркіленді.
«Барлық мекемеге келушілерге Қылмыстық және Әкімшілік кодекстердің бірнеше баптары бойынша тыйым салынған заттарды кіргізуге әрекет жасағаны үшін жауапкершілік туралы жазбаша түрде ескертіледі. Сонымен қатар, сотталған мекемеге келгеннен кейін туыстарына сотталғандардың өздерімен бірге алуға, сәлемдемелерде, бандерольдерде алуға және мекеме дүкендерінен сатып алуға рұқсат етілген заттар мен азық-түлік тізімі жіберіледі. Бірақ тыйым салынған заттардың 90 пайызы жеткізу кезінде тәркіленетінін фактілер әлі де көрсетуде», — дейді мекеме бастығының орынбасары Айдын Қалелов.
Енді аталмыш, құқықбұзушы Қазақстан Республикасының Әкімшілік құқық бұзушылық туралы кодексінің 481 бабы (қылмыстық-атқару жүйесінің мекемелерінде ұсталатын адамдарға тыйым салынған заттар, бұйымдар, нәрселер беру) бойынша әкімшілік жауапкершілікке тартылады.
