Қоғамнан оқшаулаумен байланысты емес әртүрлі қылмыстық жазаларға сотталған азаматтар көбінесе сот процесі аяқталғаннан кейін есепке тұру үшін пробация қызметіне келуді ұмытады немесе саналы түрде мүлдем келмейді. Осылайша, олар өздерінің жағдайын нашарлатады.
Сот үкімін алғаннан кейін оны орындау үшін пробация қызметкерлері сотталғанның тұрғылықты мекен-жайына барып, онымен немесе бірге тұратын адамдармен әңгімелеседі. Оларға қылмыстық-атқару заңнамасының ережелерін түсіндіріп, сондай-ақ, қажет болған жағдайда жұмысқа орналастыру және психологиялық жағынан көмек көрсетеді. Тіпті, мамандық алу үшін қысқа мерзімді оқуға баруға болатынын түсіндіреді. Болашақта үлгілі мінез-құлқы үшін жазадан мерзімінен бұрын босатылудың
да мүмкіндігі бар екенін ескертеді. Саналы азаматтардың көпшілігі өздері үшін дұрыс тұжырымдар жасайды, тіпті еріктілер қатарына жазылып, жақсылық жасауға ұмтылатындар да бар.
Өкінішке орай, барлық сотталғандар бірдей емес. Оларды жұмысқа орналастырғанымен бұрынғы өмір салтын өзгертпейді. Мысалы, 2022 жылдың басынан бастап Тайынша аудандық пробация қызметінің есебінде тұрған 7 сотталғанның бас бостандығын шектеу жазалары бас бостандығынан айыру жазаларына ауыстырылып, жаза өтеу тәртібін қасақана бұзғандары үшін түзеу мекемелеріне жіберілді.
СҚО бойынша ҚАЖД Тайынша аудандық
пробация қызметі бөлімінің бастығы
әділет майоры А.Уваисов
