Мақтаарал АПБ-нің учаскелік полиция инспекторы Нұрдаулет Айтжанов тұрғынның жоғалған сиырларын ізін суытпай тауып берді. Нақтырақ айтсақ, аудандық полиция бөліміне жергілікті тұрғын шағымданып, өріске жіберген 6 бас сиырының белгісіз жағдайда жоғалып кеткенін жеткізген.
Біреу ұрлап кетті ме, әлде жоғалды ма білмей, өздігінен 10 күн бойы ауыл-аймақты, жақын жерлерді іздейді. Алайда іздеуі сәтсіз аяқталады. Содан учаскелік полиция инспекторына хабарласып, мән-жайды айтып, көмек беруін сұрайды. Хабар алысымен полиция майоры Нұрдаулет Айтжанов іске кірісіп, барлық қажетті іс-шараларды жүргізді. Жолға толғамайтын «Нива» маркалы қызметтік көлікпен өзіне бекітілген, ой-шұқырын жақсы білетін аумақты мұқият қарап іздейді. Осындай жүйелі іздестірудің арқасында, кешкі уақытқа дейін сиырларды тауып, заңды иесіне қайтарып берді. Белгілі болғандай, ірі-қара малдар ауылдан 15 шақырым қашықтықтағы көрші ауылдан табылған.
Ауыл тұрғыны полицейлерге шынайы алғысын жаудырды: «Мен Үміт, әкемнің 6 бас сиыры жоғалды, іздедік, еш таба алмадық. Ал, полицей Нұрдаулет өзінің кәсіби шеберлігін көрсетіп, міне 1 тәулікке жеткізбей малдарымды тауып берді. Ризамын, жұмыстары алға бассын. Полицейлердің жұмысына табыс тілеймін!», — деп атап өтті.
Түркістан облысы ПД баспасөз қызметі
