Қарағанды облысының Бұқар жырау ауданындағы Семізбұғы көлінің жағасында жаңа демалыс аймағы мен шипажай кешені бой көтермек. Жобада туристерге арналған қонақүй, сондай-ақ емдік балшық пен тұзды суды қолданатын сауықтыру орталығының құрылысы көзделген.
Семізбұғы көлі өзінің шипалы суы мен балшығымен танымал. Олар тері ауруларына қарсы тиімділігімен және адам ағзасына оң әсерімен ерекшеленеді. Осы табиғи байлықты тиімді пайдалану мақсатында жаңа туристік аймақты дәл осы көлдің маңында орналастыру жоспарланған.
Қазіргі таңда Бұқар жырау ауданының сәулет және қала құрылысы бөлімі тапсырысымен аумақтың егжей-тегжейлі жоспарлау жоспары әзірленуде. 62 гектар аумақта туристік инфрақұрылымды дамыту көзделіп отыр: мұнда қонақүй, емдік-сауықтыру кешені, концерттер мен спорттық іс-шараларға арналған алаңдар салынады.
Жоспар барлық сараптамалық және келісу сатыларынан өткен соң, сәулет бөлімі жобалық-сметалық құжаттаманы әзірлеуге кіріседі. Одан кейін жоба жеке инвесторларға ұсынылады. Жобаны іске асыру және болашақ кешенді басқару жеке меншік құрылымдардың қолына беріледі.
Аймақ үшін тағы бір жағымды жаңалық — Семізбұғы көліне апаратын Корнеевка – Бұқар жырау бағытындағы 15 шақырым жолдың жөнделуі. Болашақта туристер осы жолмен көлге еш кедергісіз жететін болады.