Қазақстан – табиғаты бай, тарихи-мәдени мұрасы терең ел. Соңғы жылдары туризм саласы белсенді дамып, урбанизация үдерісімен тығыз байланыста өрбуде. Туризм елдің танымалдығын арттырса, урбанизация туристерге қажетті инфрақұрылыммен қамтамасыз етеді.
2023 жылы Қазақстанға 1,2 миллионнан астам шетелдік турист келген. Бұл — пандемияға дейінгі көрсеткішке жақындаған жоғары деңгей. Елде туризмнің экологиялық, мәдени, тарихи және емдік бағыты сұранысқа ие. Түркістандағы Ясауи кесенесі 2003 жылы ЮНЕСКО тізіміне енсе, Шарын шатқалы – табиғи ғажайып. Оның ландшафты АҚШ-тағы Гранд-Каньонмен салыстырылады. Оны жыл сайын 20 мыңнан аса адам көруге келеді.
Үкімет 2019 жылдан бастап «Kazakh Tourism» ұлттық компаниясының жұмысын күшейтіп, 2025 жылға қарай туризмнің ЖІӨ-дегі үлесін 8%-ға жеткізуді мақсат етіп отыр. Сонымен қатар, «Жібек жолы» бағыты қайта жаңғыртылып, елді аймақтық туристік хабқа айналдыру көзделуде.
Урбанизация үдерісі де қарқын алып келеді. БҰҰ дерегі бойынша, 2030 жылға қарай Қазақстан халқының 70%-ы қалаларда өмір сүруі мүмкін. Астана – әлемдегі ең жас астананың бірі. Соңғы 25 жылда қала халқы 400 мыңнан 1,3 миллионға дейін өскен. Бұл – үш еседен астам өсім. Қалаларда заманауи әуежай, метро, «ақылды қала» технологиясы мен халықаралық деңгейдегі қонақ үйлердің салынуы туризм сапасын арттыруда. Алайда урбанизация табиғи ресурстарға түсетін жүктеме мен тарихи нысандардың сақталуына қауіп төндіреді. Сондықтан тұрақты даму қағидатын ұстану – басты шарт. Ал туризм мен урбанизацияны тиімді үйлестіріп басқару – елдің халықаралық беделін арттырып, экономикалық өсімге жол ашады.
Назым Каримова,
Талдықорған қаласы
М.В Ломоносов атындағы № 5 орта мектеп-лицейінің оқушысы
