Дональд Трамп АҚШ президенті қызметіне кіріскеннен кейін, 21 қаңтардағы Қазақстандағы сауда-саттық барысында теңге долларға қатысты нығайды, — деп хабарлайды Massaget.kz тілшісі.
Қазақстан қор биржасындағы (KASE) күндізгі сауда қорытындысы бойынша доллардың орташа өлшенген бағамы 527,58 теңгені құрап, 2,36 теңгеге төмендеді. Ұлттық банктің 21 қаңтардағы ресми бағамы бір доллар үшін 529,99 теңге деңгейінде белгіленген.
kurs.kz мәліметтері бойынша қазіргі уақытта Алматыдағы айырбастау пунктерінде доллардың орташа сатып алу бағасы — 525,40 теңге болса, сату бағасы — 528,82 теңге. Астанадағы айырбастау орындарында долларды орта есеппен 524,40 теңгеден сатып алып, 529,65 теңгеден сатып жатыр.
Айта кетейік, бұған дейін Ресейде доллар бағамы алғаш рет 2024 жылдың 27 желтоқсанынан бері 100 рубльден төмен түсті. Астана уақытымен 15:41-де доллар 99,90 рубль деңгейінде саудаланды.
Дональд Трамп 20 қаңтарда ресми түрде АҚШ президенті қызметіне кірісті. Бұл жолғы инаугурация соңғы 40 жылдағы дәстүрден тыс Капитолий баспалдағында емес, ғимарат ішінде өтті.
