Қаңтардағы тәртіпсіздіктер кезінде супермаркеттерді тонаған адамдарды саусақ іздері арқылы іздейтін болды. Тонауға келгендердің көбі, мысалы, Magnum дүкендерінде адамдар азық-түлік алмаған да, сол жерде ішіп-жеп кеткен, — деп хабарлайды Tengrinews.kz тілшісі КТК телеарнасына сілтеме жасап.
Magnum өкілдері бүлік күндері түсіп қалған видеоларды жариялады. Кадрларда ондаған адам супермаркеттерден қолына түскенін жымқырып жатыр. Арасында жасы да, қарты да бар, ерлер мен әйелдер, бірінде қару бар, бірінде жоқ, маскамен де маскасыз да жүр. Сауда нүктелерін тонауға бүкіл отбасымен келген.
Желінің 15 дүкені түк қалдырмай тоналған. 11 маркет жартылай тоналған. Тағы үшеуі алдымен тоналып, кейін қиратылған. Magnum тәртіпсіздіктерден 11 миллиард теңгеге шығынға батып отыр. Бір қызығы, кей қарақшылар біраз уақыттан кейін кінәсін мойындап, залалды өтеуге өзі келеді екен.
«Қазір полицияға ұсталғандар сотта жеңілдіктер болуы үшін залалды өзі өтеуге тырысып жатыр. Біз бас тартпаймыз, камераларға қарап, кім нені ұрлағанын қалпына келтіреміз», — деді Magnum сауда желісінің PR-менеджері Дмитрий Шишкин.
