Тіл — тәуелсіз ұлттың мәдениеті мен рухани болмысының негізгі тірегі. Ұлттың өзгеден даралығын анықтайтын жалғыз да айрықша белгісі. Қай ұлт болсын тілі арқылы ерекше болмысы мен табиғи қалпын, өзіндік дәстүрін көрсете алады.
Тәуелсіздігіміздің тірегі – ұлттың тілі. Ана тіліміз арқылы халқымызды, Отанымызды танып білеміз. Әр адамның азаматтық қасиеті өз халқын, атамекенін қалай сүюімен, өз ана тілін қалай білуімен өлшенеді. Әркімнің тілге деген құрметін, өз анасына, өз ұлтына, өз Отанына деген құрметі деп білуге болады. Сондықтан ана тіліміз қастерлі де қасиетті екенін ұмытпаған дұрыс.
Қоғамда қазақ тілінің мемлекеттік дәрежесін нығайту еліміздің саясатының басты бағыты болып қала береді. Бұл бағытта көптеген мемлекеттік бағдарламалар мен іс-шаралар ұйымдастырылып жатыр. Нәтижелері де жоқ емес. Мемлекеттік қолдау мүмкіндігі жоғары салаларда қазақ тілінің қолдану аясы едәуір кеңейіп келе жатқанын айтуға толық негіз бар. «Өзге тілдің бәрін біл, өз тіліңді құрметте!» деп Қадыр ақын айтқандай, қазіргі қоғам басқа тілді үйренуге еш шек қоймайды. Дегенмен, қазақ тілін мемлекеттік тіл дәрежесіне көтеруге әр қазақтың үлесі болса екен дейді.
Тіліміздің мәртебесі — еліміздің мәртебесі, ал тіл мәртебесі халықтың қолында. Тілді қаншалықты бағалап құрметтесек, соншалықты еліміздің еңсесі биік болмақ. Ел тәуелсіздігі –тіл тәуелсіздігі, тіл – ұлттың төлқұжаты, мемлекеттік тұғыры демекші, осы бағыттағы болашақтың берік іргетасы бүгін қалануы қажет. Әсіресе, өсіп келе жатқан жас ұрпақтың мемлекеттік тілде жұмыс істеуіне жақсы жағдай жасаумен қатар, мемлекеттік тілде іс жүргізуді де жүйелі қалыптастыру керек, сонда ғана ана тіліміз өсіп-өркендеп, үлкен мәртебеге ие болады, қазіргі әлемде кең қолданыста жүрген тілдермен терезесі теңеледі
Тараз қаласының
мамандандырылған тергеу соты
әкімшісінің бас маман –
сот отырысының хатшысы
Р.Н.Манапов
