Бұл туралы бүгін ҚР Президенті жанындағы Орталық коммуникациялар қызметі алаңында Түркістан облысының әкімі Нұралхан Көшеров Оралбайұлы мәлімдеді.
Ол өз баяндамасында «Өндірісті дамыту мақсатында өңірімізге сырттан келетін тауарларға талдау жүргіздік. Негізгі үлес құрылыс материалдары, жеңіл өнеркәсіп, машина жасау, химия өнеркәсібі және тамақ өндірісіне тиесілі. Олар бойынша импорт көлемі 98 млрд.теңгені құрайды. Бұл тауарларды облыста шығаруға барлық мүмкіндіктеріміз бар. Инвесторлармен келіссөздер жүргізіп, оларға индустриалдық және арнайы экономикалық аймақтардан дайын алаңшаларды ұсындық. Импорт алмастыратын 20 жоба іске асырылуда. Бұл өз кезегінде 53 млрд.теңгеге жуық импорт тауарларын алмастыруға мүмкіндік береді. Бұдан басқа бірнеше маңызды жобаларды іске асыруға қол жеткіздік» дей келіп, дәл қазіргі таңда өңірде атқарылып жатқан шараларға тоқталды.
«Индустриалдық аймақтарда құны 152 млрд. теңгені құрайтын 99 инвестициялық жоба іске асырылуда. 6 361 жұмыс орны ашылады. Бүгінгі таңда 39 млрд. теңге инвестиция тартылып, 50 жоба іске қосылды, 2 609 адам тұрақты жұмыспен қамтылды. «Turan» арнайы экономикалық аймағында 211,8 млрд. теңгеге 28 ірі жоба жүзеге асырылуда».