Сыбайлас жемқорлық – қоғамның тұрақтылығына, мемлекет дамуына тікелей қауіп төндіретін ең өзекті мәселелердің бірі. Ол экономиканың өркендеуіне кедергі келтіріп қана қоймай, азаматтардың билікке деген сенімін әлсіретеді, әлеуметтік әділдікті бұзады. Сондықтан елімізде жемқорлықпен күрес мемлекеттік саясаттың негізгі бағыттарының біріне айналып отыр. «Сыбайлас жемқорлыққа жол жоқ!» деген ұстаным бүгінде барша қазақстандыққа ортақ талап болуы тиіс.
Мемлекет деңгейінде атқарылып жатқан жұмыстар аз емес. Әртүрлі заңнамалық реформалар, мемлекеттік қызметтердің ашықтығын арттыру, цифрландыру жүйесін енгізу – бәрі де осы кеселдің таралуына тосқауыл қоюға бағытталған. Әсіресе, электронды қызметтердің кеңеюі азамат пен мемлекеттік орган арасындағы тікелей байланысты азайтып, парақорлық тәуекелдерін төмендетуге мүмкіндік беріп отыр.
Дегенмен, жемқорлықпен күрес тек заңдар мен институттардың міндеті емес. Бұл – бүкіл қоғамның ортақ жауапкершілігі. Әрбір азамат өз ісіне адал болып, заңсыз әрекеттерге жол бермеуді принцип ретінде қабылдағанда ғана өзгеріс нақты сезіледі. Отбасында, мектепте, жұмыс орнында адалдық пен әділдік құндылықтарын қалыптастыру – бұл күрестің ең маңызды бөлігі.
Жастардың рөлі ерекше. Өйткені олар – ел ертеңін қалыптастыратын буын. Жоғары рухани мәдениетке ие, парасатты, әділ, заңды құрметтейтін жас ұрпақсыз жемқорлықсыз қоғам құру мүмкін емес. Сондықтан білім беру орындарында сыбайлас жемқорлыққа қарсы мәдениетті нығайту, құқықтық сауаттылықты арттыру жұмыстары жүйелі түрде жүргізілуі қажет.
Қоғамдағы ашықтық пен жариялылық та маңызды фактор. Мемлекеттік шешімдер мен шығындардың ашық болуы азаматтардың сенімін күшейтіп қана қоймай, бақылау тетіктерін де тиімді етеді. Әрбір тұрғын өз құқығын білуі және қажет болған жағдайда заң бұзушылықтарды дер кезінде хабарлап отыруы – әділдіктің орнауына үлкен үлес қосады.
Қорытындылай айтқанда, сыбайлас жемқорлықпен күрес – ұзақ әрі үздіксіз процесс. Бірақ оның нәтижесі – адалдықты ту еткен, әділдікке негізделген, дамыған қоғам. Сондықтан «Сыбайлас жемқорлыққа жол жоқ!» деген ұран қағаз бетінде ғана емес, күнделікті өмірдің басты қағидатына айналуы тиіс. Ел болашағы үшін әр азаматтың үлесі маңызды.
Шымкент қаласының мамандандырылған ауданаралық әкімшілік сотының бас маман- сот отырысының хатшысы Е.Ордабек
