Қорғаныс министрлігі Сорбұлақта жоғалған әскери тікұшақ экипажының мүшелері туралы ақпарат жариялады, — деп хабарлайды Massaget.kz тілшісі.
10 тамызда экипаж командирі майор Нұржігіт Үйсінбаевтың денесі табылды.
«Ол эскадрилья командирінің (армиялық авиация) тәрбие және идеологиялық жұмыс жөніндегі орынбасары болды. 1-сыныпты ұшқыштың EC-145 тікұшағын басқаруда тәжірибесі айтарлықтай зор, жалпы ұшу уақыты — 930 сағат. Жоғары кәсіби дайындығымен, жауапкершілігімен және әскери борышына адалдығымен ерекшеленген ол әріптестері мен қолбасшылық арасында зор құрметке ие болатын», — деп жазылған хабарламада.
11 тамызда капитан Бақтияр Ержігітовтің денесі табылды.
«1-сыныпты маманның EC-145 тікұшағын басқаруда тәжірибесі жеткілікті, жалпы ұшу уақыты — 300 сағат. Авиациялық бөлімдерде көп жылдық тәжірибе жинақтаған жоғары білікті маман бейіндік дайындықтан да өткен», — деп жазылған хабарламада.
12 тамызда экипаж командирінің көмекшісі, капитан Аман Амангелдінің денесі табылды.
«Тәжірибелі ұшқыш, күрделі метеорологиялық жағдайларда бірнеше мәрте ұшып жаттыққан. Түрлі ауқымдағы жаттығулар мен операцияларға қатысқан. Жоғары орындаушылық тәртібімен және мінсіз қызметтік беделімен ерекшеленген. EC-145 тікұшағындағы ұшу уақыты — 295 сағат», — деп жазылған хабарламада.
Қаза тапқан ұшқыштардың үшеуі де Әуе қорғанысы күштері әскери институтының түлегі.
Еске салайық, 25 шілдеде Алматы облысында EC-145 әскери тікұшағы радардан жоғалып кетті. 26 шілдеде тікұшақтың сынықтары Сорбұлақ көлінен табылды.
