Шымкент жыл сайын қарқыны бәсеңдемейтін, керісінше үнемі алға ұмтылатын, демографиясы да, экономикасы да серпінді дамып келе жатқан мегаполис екеніне биылғы брифингте көзіміз жетті. Онда қала әкімі Ғабит Сыздықбеков журналистер алдында әлеуметтік-экономикалық ахуалға кең көлемде тоқталып, мегаполистің бүгіні мен ертеңіне жоспарланған жобалармен таныстырды.
Әкімнің айтуынша, биылғы 10 айда Шымкенттің экономикасы 14,8 пайызға өсіп, республика бойынша алғашқылардың қатарында тұр. Сауда, байланыс, өнеркәсіп, құрылыс, инвестиция – барлық секторда өсім бар. Жыл басынан бері 982 мың шаршы метр тұрғын үй пайдалануға беріліп, қала мегаполис ретіндегі мүмкіндігін толық көрсеткен.
«Біздің негізгі байлығымыз – еңбекқор халық пен тұрақты өсімге деген жігер. Шымкент инвестор үшін де, тұрғын үшін де тартымды қалаға айналып келеді», – деді әкім.
