Итэвонда (Сеул, Оңтүстік Корея) Хэллоуинді тойлау кезінде жаппай қысымнан қаза тапқандар саны 158 адамға жетті, — деп хабарлайды Tengrinews.kz тілшісі РИА Новости басылымына сілтеме жасап.
Басылым мәліметінше, 196 адам зардап шеккен, оның 10-ы әлі ауруханада жатыр.
Оларды Итэвон ауданындағы Гамильтон қонақүйі маңындағы Хэллоуин мерекесі кезінде тар көшеде алға жылжып бара жатқан топ басып қалған.
Көпшіліктің бұл әрекетіне не себеп болғаны белгісіз. Дегенмен кейбір жергілікті бұқаралық ақпарат құралдары мәліметінше, адамдар сол жерде қандай да бір атақты адам барын естіген.
Әлеуметтік желілердегі кадрлардан көптеген зардап шеккен адамның жолда жатқанын көруге болады, ал төтенше жағдайлар қызметкерлері мен куәгерлер оларға көмектесу үшін жүрек-өкпе жаттығуын жасаған.
Басылым мәліметінше, қаза тапқандардың 102-сі — әйел, 56-сы — ер адам. Зардап шеккендердің 12-сі — 10-20 жас аралығында, 105-і — 20-30 жас аралығында, 31 адам — 30-40 жас аралығында, тағы тоғыз адам — 40-50 жас аралығында, бір адам 50-де екені анықталған.
Қаза болғандар ішінде 26 шетелдік, оның ішінде төрт ресейлік, төрт Қытай азаматы, бес Иран азаматы, екі АҚШ және Жапония азаматы, Франция, Аустралия, Вьетнам, Өзбекстан, Норвегия, Қазақстан, Шри-Ланка, Түркия және Австриядан бір адам бар. Оңтүстік Корея президенті Юн Сок Ёл қайғылы оқиғаға байланысты 5 қарашаға дейін ұлттық аза тұту жариялады.
Еске салайық, мыңдаған адам 29 қазанда Сеулдің әйгілі Итэвон ауданына кейінгі үш жылдағы алғашқы Хэллоуин мерекесін тойлауға жиналды. Адамдар жиналғанда хаос басталып, адамдар есінен тана бастаған.
