Биыл алғаш рет 24 маусымға белгіленген «Судья мен сот қызметкерлері күні» кәсіби мерекесі аталып өтілді.
Аталған мереке қарсаңында Қызылорда облыстық сотында салтанатты шара болып өтті. Шара барысында сот ардагерлері мен қызметте жетістікке жеткен судьялар мен қызметкерлер марапатталды.
Сонымен қатар, кәсіби мереке аясында өмірден өткен әріптестерді еске алуға арналған облыстағы соттар арасында волейболдан жарыс ұйымдастырылып, жеңімпаздар анықталды.
Осы шаралардың жалғасы ретінде Қызылорда облыстық соты мен Судьялар Одағының Қызылорда облыстық филиалының ұйымдастыруымен сот саласында қызмет жасап, өмірден өткен әріптестерге арнап құран бағышталып, ас берілді.
Асқа өмірден өткен әріптестердің туыстары, сот ардагерлері, журналистер, қоғамдық ұйым өкілдері мен облыс соттарының ұжымы қатысты.
Өмірден өтсе де жарқын бейнесі жадымызда мәңгі сақталған әріптестерімізді еске алып, құрмет көрсету үлгілі іс. Көпке өнеге болатын шараны облыстық сот төрағасының міндетін атқарушы Ә.Шығамбаев ашып, өмірден өткен аға буынды еске алып, олардың жүріп өткен жолы қашан да өнеге екендігін айтып өтті.
Мұнан соң қайтыс болған судьялар мен қызметкерлер туралы бейнеролик көрсетіліп, қатысушылар олар туралы естеліктерімен бөлісіп, ұйымдастырушыларға алғысын жеткізді.
Ас беру рәсімін Судьялар одағының облыстық филиалының төрағасы М.Еркінбеков пен соттар әкімшісі басшысы С.Сүлеймен қорытындылап, кешегі өткен әріптестер мен бүгінгі буын арасындағы ұрпақтар сабақтастығының үзілмегенін, сондықтан алдағы уақытта да осы сынды тағылымы мол шаралардың өткізілетінін атап өтті.
Қызылорда облыстық сотының баспасөз қызметі