Алматыдағы AmalBooks баспасы «Как управлять казахами» деп аталатын жаңа кітапты басып шығарды. Бұл Ресей патшайымы Анна Иоанновна тұсында обер-хатшы болған Иван Кирилловтың «Об удержании в русском подданстве киргиз и способах управления ими» деген жобасының негізінде құрастырылған деректер жинағы.
«Бұл біздің халық санасын отарсыздандыру мақсатында 2021 жылдан бері шығарып келе жатқан «Таза тарих» сериясы аясында жарық көрген он бірінші кітап болып отыр. Иван Кириллов патшайым Анна Иоанновнаға осы жобаны ұсынады. Ол 1734 жылы 1 мамырда мақұлданып, патшайым Кирилловты оған жауапты етіп бекітіп, статтық кеңесші мәртебесін берген екен», – дейді баспагер Бақытжан Бұқарбай.
Баспагердің айтуынша, бұл деректер тарихымызда қалыптасқан мифтерді жоққа шығаруға көмектеседі. Кеңес дәуірінде, әсіресе сталиндік биліктің нұсқауымен Ресей империясының қазақ жерін отарлау саясаты бүркемеленіп, халықтың санасына қазақтардың Ресейге өз еркімен қосылғаны туралы жалған түсінік сіңірілді. Өйткені патшалық Ресей дәуірінде мақұлданған жобаның авторы өздерінің Орта Азия елдерін отарлау саясатын жасырмай, бұл бағытта жүргізілетін іс-шаралары мен олардың бюджеттік шығындарын әрбір тиынына дейін есептеп шығарған.
Кітап мұқабасын безендіруге суретші Нұрлан Қилыбаевтың «Аманат» деген жұмысы қолданылған. Жыл соңына дейін «Таза тарих» сериясы бойынша шығатын кітаптар санын отызға дейін жеткізуді жоспарлап отырған баспаның алдында тұрған басты мақсат – дерек көздерін жалпы оқырманға жеткізу.
Ерлік ЕРЖАНҰЛЫ «Заң газеті»
