Ағымдағы жылдың 29шы наурызында Атырау облысы бойынша ҚАЖД №79 мекемесінде “Шапағат” ҚҚ психолог маманы Г.Кубышеваның қатысуымен теологиялық және психологиялық оңалту жұмыстарын жүзеге асыру мақсатында, діни экстремизм және терроризм бабы бойынша жазасын өтеушілермен «Қарым-қатынас тренингі» өтті.
Мақсаты — қатысушылардың айналасындағы адамдармен, қоршаған ортамен жағымды қарым-қатынас дағдыларын дамыту және белсенді қарым-қатынас стилін меңгерту. Мінез-құлқы, көңіл-күйі, мақсаты, өмірлік бағыты, болмысы әртүрлі адамдарды түсіне білгенде ғана өмір қызықты да мәнді болады. Өмірде алуан түрлі тағдырлы, мінезді адамдар кездеседі. Олармен дұрыс қарым-қатынас жасай білу – баға жетпес байлық.
Тренинг басында «Қарым-қатынас деген не?» сұрағына жауап алынды. «Сахналау» бөлімінде адами қарым — қатынастағы ең басты әдептілік бұл — сәлемдесу болғандықтан, қазақ халқындағы сәлемдесудің бірнеше түрін сахналау тапсырмасы берілді. “Жағымды сөз” тренингі тұлғааралық қарым-қатынасты реттесе, «Екі бақа туралы аңызды» талқылау өз ойларын ортаға салуға мүмкіндік берді. И.Панариннің тест-сауалнамасы бойынша әр қатысушы 4 түрлі пішінді қалаулары бойынша таңдап, сол фигуралар арқылы өздерінің тұлғалық қасиетін анықтады.
«Көктемгі гүл» арттерапиялық жаттығу барысында бірдей материалдан бір біріне ұқсамайтын әртүрлі гүл жасалып, оны өздеріне ең жақын адамдарына ойша сыйға тартты. “Қарым-қатынас тренингінің” қатысушыларға берері көп болды, шара соңында алған әсерлерімен бөлісті.
