Мемлекет басшысы Қасым-Жомарт Тоқаев 2021 жылғы Қазақстан халқына Жолдауында отбасылық-тұрмыстық зорлық-зомбылық мәселелеріне ерекше көңіл бөлді. Оның құрбандарына көмек көрсету үшін тиісті шараларды қабылдауды тапсырды. Осы тұрғыда полиция қызметкерлері жұмыла бірігіп, отбасындағы зорлық-зомбылықтың алдын алу үшін тиісті шараларды атқаруда.
Мәселен, Созақ аудандық полиция бөлімінің қызметкерлері «Мыңжылқы» мәдениет үйінде «Отбасылық-тұрмыстық зорлық-зомбылық» тақырыбында форум өткізді. Оған аудан көлемінде мемлекеттік органдардың, үкіметтік емес ұйымдар мен бұқаралық ақпарат құралдарының өкілдері қатысты. Шара кезінде Созақ АПБ-ның полиция майоры Айжан Манапова баяндама оқыды. Ол 2022 жылдың 7 айында әйелдерге қарсы күш қолданудың – 111 жайтын, Қорғау нұсқамасы бойынша — 120, ерекше талаптар белгіленген – 22, сонымен қатар әйелдерге қатысты жасалған құқық бұзушылықтың 50 жайты тіркелгенін баяндады. Жиын барысында полиция майоры зорлық-зомбылықтың құрбандарына кешенді көмек көрсету жөнінде пилоттық жоба еліміздің барлық өңірлерінде барын айтты. Сонымен қатар «Сенім-Ай» қоғамдық бірлестігінің «Көмек» дағдарыс орталығы жайлы толық мәлімет берді. Зорлыққа ұшыраған әйелдер мен балалар үшін арнайы медициналық, әлеуметтік, психологиялық және құқықтық көмек көрсетілетінін баса айтты. Шара соңында «Отбасындағы зорлық-зомбылыққа жол жоқ!» акциясы шеңберінде дайындалған арнайы брошюралар таратты. Сөз соңында А.Манапова «Әйел – ана. Халқымыздың татулығы, береке–бірлігін келтіруші ана екендігі барлығымызға белгілі. Сондықтан әйел-аналарға қатысты зорлық-зомбылықты болдырмау бағытында ел болып, қоғам болып күресейік!» — деп атап өтті.
Түркістан облысы ПД баспасөз қызметі