Отбасы – баланың тұлға болып қалыптасуындағы ең алғашқы әрі ең маңызды орта. Баланың мінез-құлқы, дүниетанымы, адамгершілік қасиеттері ең алдымен отбасында қалыптасады. Сондықтан отбасындағы тәрбие – қоғамның болашағын айқындайтын негізгі факторлардың бірі.
Бала тәрбиесінде ата-ананың рөлі ерекше. Ата-ана балаға тек өмір сүру үшін қажетті жағдай жасап қана қоймай, оған дұрыс бағыт-бағдар беруі тиіс. Үлкенге құрмет, кішіге ізет, еңбекқорлық, адалдық, жауапкершілік сияқты құндылықтар ең алдымен отбасында үйретіледі. Бала ата-анасының іс-әрекетіне қарап, солардан үлгі алады. Сондықтан ата-ананың сөзі мен ісі бірдей болуы өте маңызды.
Отбасындағы қарым-қатынас та бала тәрбиесіне тікелей әсер етеді. Үйде мейірім мен сыйластық орнаған болса, бала өзін қауіпсіз сезінеді, өз ойын еркін жеткізе алады. Ал үнемі ұрыс-керіс болатын отбасында өскен бала тұйық, сенімсіз немесе агрессивті болып өсуі мүмкін. Сол себепті ата-аналар баламен жиі сөйлесіп, оның пікірін тыңдап, түсінуге тырысуы қажет.
Бала тәрбиесінде ұлттық тәрбиеге де ерекше көңіл бөлген жөн. Қазақ халқы «Тәрбие – тал бесіктен» деп бекер айтпаған. Салт-дәстүрді, әдет-ғұрыпты, ана тілін құрметтеу арқылы бала өз халқының мәдениетін танып өседі. Бұл оның рухани бай, елжанды азамат болып қалыптасуына көмектеседі.
Қорытындылай келе, отбасында берілген тәрбие – баланың бүкіл өміріне әсер ететін негіз. Ата-ана өз міндетін жауапкершілікпен атқарып, балаға сүйіспеншілік пен дұрыс тәрбие бере алса, болашақта саналы, тәрбиелі, қоғамға пайдалы тұлға қалыптасады.
Түркістан облысының кәмелетке толмағандардың істері жөніндегі мамандандырылған ауданаралық сотының судьясы С.Нахипов