Жамбыл облыстық соты мен Батыс Қазақстан облыстық сотында төрағалар ауысты. Бұған дейін Қазақстан Республикасы Әскери сотының азаматтық істер жөніндегі сот алқасының төрағасы қызметін атқарған Ербол
Ахметжанов Жамбыл облыстық сотының төрағасы болып тағайындалды.
Жоғарғы Соттың азаматтық істер жөніндегі сот алқасының төрағасы Мейрамбек Таймерденов Жамбыл облысының судьялар ұжымына жаңа төрағаны таныстырды. Бұл ісшараға облыс әкімі Бердібек Сапарбаев, облыстық соттың бұрынғы төрағасы Рүстем Мырзакәрім, өңір судьялары, сот жүйесінің ардагерлері, құқық қорғау органдарының басшылары және адвокаттар қатысты.
Ал, Жоғарғы Соттың Қылмыстық істер жөніндегі сот алқасының төрағасы Әбдірәшид Жүкенов Батыс Қазақстан облыстық сотының жаңадан тағайындалған төрағасы Рүстем Мырзакәрімді өңірдегі судьялар корпусына таныстырды. Кездесуге өңір әкімі Ғали Есқалиев, судьялар, мемлекеттік және құқық қорғау органдарының басшылары қатысты. М.Таймерденов пен Ә.Жүкенов жаңа төрағалар жұмысына табыс тілеп, сот істерін сапалы жүзеге асыру, заңның үстемдігін қамтамасыз ету және азаматтардың сотқа деген сенімін нығайту жолында өздерінің кәсіби және көпжылдық жұмыс тәжірибелерін жүзеге асыратынына сенім білдірді. Жаңа қызметке кіріскен қос төрағаның жұмысына сәттілік тілейміз.
«Заң газеті»
[ratings]
