Қоғамдағы тұрақтылық пен өзара сыйластық ең алдымен ортақ құндылықтарды құрметтеуден басталады. Сол құндылықтардың бірі әрі бірегейі – мемлекеттік тіл. Мемлекеттік тілдің құқықтық салада, соның ішінде сот жүйесінде қолданылуы елдегі бірлік пен татулықты нығайтуға тікелей әсер етеді.
Қазақстан Республикасында қазақ тілі мемлекеттік мәртебеге ие. Осы мәртебе сот ісін жүргізу барысында нақты жүзеге асырылып, барлық ресми құжаттар мен сот процестері заң талаптарына сәйкес мемлекеттік тілде рәсімделеді. Бұл азаматтардың құқықтарын толық түсінуіне және сот шешімдерінің айқын әрі ашық болуына мүмкіндік береді.
Сот процесіне қатысушылардың ұлты мен әлеуметтік жағдайы әртүрлі болғанымен, мемлекеттік тіл баршаға ортақ құқықтық кеңістік қалыптастырады. Бір тілде жүргізілген іс тараптар арасындағы түсініспеушіліктің алдын алып, істің әділ әрі заңды шешілуіне жағдай жасайды. Нәтижесінде қоғамда сенім мен келісім беки түседі.
Құқық саласындағы мамандардың мемлекеттік тілді сауатты қолдануы – құқықтық мәдениеттің маңызды көрсеткіші. Ресми терминдерді дұрыс пайдалану, іс жүргізу нормаларын сақтау сот жүйесінің беделін арттырып, азаматтардың заңға деген құрметін қалыптастырады.
Мемлекеттік тіл – тек қатынас құралы ғана емес, ол халықты біріктіретін рухани негіз. Сот саласында мемлекеттік тілдің кеңінен қолданылуы ел бірлігін сақтауға, қоғамдық татулықты нығайтуға қызмет етеді.
Қорытындылай келе, мемлекеттік тілдің сот жүйесіндегі орны ерекше. Ол – әділдіктің, заң үстемдігінің және қоғамдағы келісімнің берік тірегі.
Шымкент қаласының мамандандырылған ауданаралық экономикалық сотының бас маман- сот отырысының хатшысы
Романкул Аян Нұрланқызы
