Астанада LRT құрылысының маңызды кезеңі аяқталды, — деп хабарлайды Massaget.kz тілшісі.
City Transportation Systems (CTS) мәліметінше, жалпы ұзындығы 22,4 шақырым болатын LRT негізгі желісінде рельстерді төсеу жұмыстары аяқталған. Бұл — LRT құрылысындағы негізгі кезеңдердің бірі.
«101-118 станция аралығында және олардың аралықтарында 89 600 метр рельс төселді. Қазір рельстерді дәнекерлеу жұмыстары жүргізіліп жатыр, одан кейін соңғы рет бекітіледі», — деп жазылған хабарламада.
Құрылыс барысында құрамында темір мөлшері жоғары көміртекті болаттан жасалған рельстер қолданылған. Бұл технология жылжымалы құрамның қозғалысы кезінде шу мен діріл деңгейін едәуір төмендетуге мүмкіндік береді.
«Ол жолаушылар мен жақын маңдағы аудан тұрғындарына қолайсыз жағдай туғызбау үшін жасалған», — деп жазылған хабарламада.
Бұдан кейін төтенше жағдайлар кезінде жолаушылардың қауіпсіздігін қамтамасыз ететін эвакуациялық платформалар орнатылады.
