Биыл барша қазақстандықтар үшін аса маңызды тарихи дата — Қазақстан Республикасы Конституциясының қабылданғанына 30 жыл толып отыр.
1995 жылдың 30 тамызында бүкілхалықтық референдум арқылы қабылданған Ата Заңымыз еліміздің Тәуелсіз мемлекет ретінде қалыптасуына және даму жолына түсуіне зор ықпал етті. Онда мемлекеттің құрылымы, азаматтардың құқықтары мен бостандықтары нақты айқындалған. Бұл – құқықтық мемлекет құру жолындағы ең маңызды қадамдардың бірі болды.
Судьялардың міндеті – Конституцияда белгіленген қағидаларды басшылыққа ала отырып, азаматтардың құқықтарын қорғау, әділдік пен заң үстемдігін қамтамасыз ету. Әрбір шешімнің, әрбір іс-әрекетің заңға негізделуі – қоғамдағы сенімді нығайтады.
Осы үш онжылдық ішінде еліміз ауқымды реформаларды бастан өткерді. Конституцияға енгізілген өзгерістер уақыт талабына сай демократиялық процестерді тереңдетуге, азаматтық қоғамды дамытуға бағытталды. Соңғы жылдары қолға алынған саяси реформалар – Жаңа Қазақстанды құру жолындағы маңызды қадамдар. Бұл – ел Президентінің бастамасымен жүзеге асқан әділетті және ашық қоғам құруға деген ұмтылыстың айғағы.
Конституцияда бекітілген басты құндылық – адам және оның құқықтары. Сот саласы осы қағидатты күнделікті қызметінде басшылыққа алады.
Қазақстан Республикасы Конституциясының 30 жылдығы – бұл тәуелсіздіктің, бейбіт өмір мен бірліктің, заң үстемдігінің мерекесі. Сот және сот қызметкерлері, Ата Заңға адал қызмет ете отырып, елдің болашағына өз үлестерін қосу қажет. Әділеттілікке, заңдылыққа негізделген қоғам – баянды болашақтың кепілі. Конституция – соған бастайтын сенімді жол.
Ақтөбе қаласының №3 сотының
судьясы С.К.Муханов
