Жамбыл облысы кәмелетке толмағандардың істері жөніндегі мамандандырылған ауданаралық сотымен Әкімшілік құқық бұзушылық туралы Кодексінің (әрі қарай – ӘҚБтК) 127-бабының 3-бөлігінде көзделген әкімшілік құқық бұзушылық жасағаны үшін (Кәмелетке толмаған адамды тәрбиелеу және (немесе) оған білім беру, оның құқықтары мен мүдделерін қорғау жөніндегі міндеттерді орындамау) бойынша азаматша Ж.-ға қатысты әкімшілік іс қаралды.
Анық болғандай, Жамбыл облысы Т.Рысқұлов ауданы, Көгершін ауылында азаматша Ж.-ның жасы кәмелетке толмаған ұлы А. жасы кәмелетке толмаған О.-ны өзінің ауылдасымен бірге ұрып-соғып, жеңіл дәрежелі дене жарақатын салған. Өз кезегінде А.-ның жасы 16-ға толмағандықтан, оның заңды өкілі азаматша Ж.-ға қатысты ӘҚБтК-нің 127-бабының 3-бөлігімен әкімшілік құқық бұзушылық туралы хаттама толтырылып, сотта Ж.-ның ата-аналық міндеттерін тиісті түрде орындамағандарының салдарынан оның жасы кәмелетке толмаған баласы әкімшілік құқық бұзушылық белгілері бар қасақана әрекеті жасағаны іске тіркелген құжаттармен толық дәлелденді.
ӘҚБтК-нің 127-бабының 3-бөлігіне сәйкес, жасалынған құқық бұзушылық үшін жиырма айлық есептік көрсеткіш мөлшерінде айыппұл салуға не он тәулікке дейінгі мерзімге әкімшілік қамаққа алуға әкеліп соғады.
Сот қаулысымен азаматша Ж. ӘҚБтК-нің 127-бабының 3-бөлігімен кінәлі деп танылып, оған 20 айлық есептік көрсеткіш мөлшерінде айыппұл салу түріндегі әкімшілік жаза тағайындалды, алайда жауаптылықты жеңілдететін мән-жайларды ескере отырып, айыппұл сомасы 30%-ға төмендетіліп, ол 48 300 (қырық сегіз мың үш жүз) теңгені құрады.
Қаулы заңды күшіне енген жоқ.
Жамбыл облысы кәмелетке толмағандардың істері жөніндегі мамандандырылған ауданаралық соты сотының баспасөз қызметі
