Тергеу изоляторында 150 жуық күдікті сот үкімін күтіп жатыр. Орал тергеу изоляторында жатқандар мекемедегі сайлау учаскесінде дауыс берді.
БҚО Орал қаласының №74 мекемесінің тергеу изоляторында жатқан күдіктілер мекемеде орналасқан сайлау учаскесіне келіп, дауыс берді. ҚР Қылмыстық-атқару кодексінің 104-бабының 3-бөлігінде сот түбегейлі үкімі шығарғанға дейін тұтқынға алынған күдіктілердің сайлауға қатысуға құқығы бар.
Аталған санатқа тергеу тұтқынындағылар мен сот үкімі әлі күшіне енбеген, жасы он сегізге толғандар жатады.
«Мемлекет басшысы Қасым-Жомарт Тоқаев 1 қыркүйекте Қазақстан халқына арнаған Жолдауында Қазақстанда кезектен тыс президент сайлауы өтетінін мәлімдеген болатын. Кезектен тыс президент сайлауын ұйымшылдықпен өткізуге БҚО бойынша Қылмыстық-атқару жүйесі департаментіне қарасты №74 мекемесінде тергеу изоляторы орналасқан аумақ бойынша №464 сайлау учаскесі құрылып, учаскелік сайлау комиссиясының мүшелері бекітілді. Президент сайлауы күні тергеу тұтқынында жатқан және сот үкімі заңды күшіне енбеген 150 жуық тұлға дауыс берді», — деді № 464 сайлау учаскесінің төрағасы әділет майоры С.С.Утешкалиев.
ҚАЖД баспасөз қызметінің мәліметінше, мекемеде қауіпсіздік шарасын сақтау мақсатында изоляторлардың камерасынан дауыс беретін учаскеге дейін қосымша посттар ұйымдастырылып, дауыс берушілердің қозғалыс маршруты бекітілген.
