Газетіміздің өткен санында «Азаматтық алуға Ұлттық қауіпсіздік тұрғысынан қарау керек» деген материал жарияланған еді. Онда осы уақытқа дейін азаматтық пен тіл туралы заңдардағы олқылықты пайдаланып, Қазақстанға қажет маман деген желеумен 40 түрлі кәсіп иесінің Қазақстан азаматтығын еш қиындықсыз алып келгенін мәселе етіп көтергенбіз.
Сонымен қатар, ҚР Ішкі істер министрі Марат Ахметжановтың атына ресми хат жолдадық. Онда соңғы екі айда Ресей мен Украинадан Қазақстанға келгендердің нақты саны; олардың уақытша тұруға және азаматтық алуға өтініш білдіргендерінің үлесі; жеңілдетілген тәртіппен Қазақстан азаматтығына қабылдауды пайдаланғандар санына қатысты мәлімет беруін сұрағанбыз.
Біздің сұрауымызға министрліктен: «Ағымдағы жылғы ақпан айында Ресей Федерациясының 45120 азаматы, ал наурыз айында 64 010 азаматы Қазақстанға келген. Сонымен қатар, ақпан айында – 1860, ал наурыз айында 1610 Украина азаматы Қазақстанға келді. 2022 жылдың екі айында жеңілдетілген тәртіппен Қазақстан Республикасының азаматтығына Ресей Федерациясының 113 азаматы (28 – қандастар, келісім бойынша – 73, тұрмыстағы әйелдің азаматтығы туралы Конвенция бойынша – 12) қабылданды, Украина азаматтары қабылданған жоқ. Бұл ретте, Қазақстан Республикасының азаматтығын қабылдау туралы 98 Ресей азаматы мен 4 Украина азаматы өтініш білдірді» деген жауап алдық.
Ұлттық статистика бюросының дерегінше, биыл қаңтарда елімізге сырттан 1291 адам келген. Былтырғы жылдың сәйкес кезеңінде олардың саны – 626 болған еді. Былтырғы алғашқы айда келгендердің көбі Алматы (88), Шымкент (68) қалалары мен Маңғыстау облысын (88) таңдаған еді. Биылғы қаңтарда келгендердің 615-і Маңғыстау облысын, 136-сы Шымкент қаласын,117-сі Алматы қаласын таңдапты.
Ерлік ЕРЖАНҰЛЫ,
«Заң газеті»
