Президент Қасым-Жомарт Тоқаев қазақстандық өнер майталмандарын Мәдениет және өнер қызметкерлері күнімен құттықтады, — деп хабарлайды Tengrinews.kz тілшісі.
Мемлекет басшысы құттықтауын Twitter-де жазды.
«21 мамыр – Қазақстанның мәдениет және өнер қызметкерлері күні. Ел идеологиясы мен жаңғыруында орны айрықша осы саланың барлық майталманын кәсіби мерекелерімен құттықтаймын! Сіздерге шығармашылық табыс тілеймін!», — деді ол.
Тоқаев «Қазақстанның халық әртісі» құрметті атағын қайтару керек екенін де айтты.
«Бүгін тиісті министрлікке «Қазақстанның халық әртісі» құрметті атағын қайтаруды қолға алу туралы тапсырма бердім», — деді Президент.
