Президент Қасым-Жомарт Тоқаев кепілдендірілген трансферт туралы заңға қол қойды, — деп хабарлайды Tengrinews.kz тілшісі Ақордаға сілтеме жасап.
«Қазақстан Республикасының Ұлттық қорынан 2022-2024 жылдарға арналған кепілдендірілген трансферт туралы» Қазақстан Республикасының Заңына өзгеріс енгізу туралы» Қазақстан Республикасының Заңына қол қойды», — делінген хабарламада.
Сонымен қатар, Мемлекет басшысы «2022-2024 жылдарға арналған республикалық бюджет туралы» Қазақстан Республикасының Заңына өзгерістер мен толықтырулар енгізу туралы» Қазақстан Республикасының Заңына қол қойды.
Еске салайық, 5 сәуірде ұлттық экономика министрі Әлібек Қуантыров Ұлттық қордан түсетін трансферт неге ұлғайғанын түсіндірген болатын. Үкіметтің Ұлттық қордан аударылатын трансфертті бірден 1,6 триллион теңгеге арттыруды жоспарланған еді.
«Біз Мемлекет басшысының қаңтар айының басында берген тапсырмаларын іске асыруға, сондай-ақ түрлі бағдарламалық құжаттарға ақша аламыз. Ұлттық қор басқалармен қатар контрциклдік бюджетті жүргізудің құралы.
Ұлттық қордың бірнеше функциялары бар: жинақ, тұрақтандыру және дағдарысқа қарсы. Бұл процесс қалыпты. Бұл контрциклді бюджет саясатының бір бөлігі», — деді Қуантыров.
Оның айтуынша, мұнай бағасының қымбаттауы мен доллар бағамының жоғары болуына байланысты Ұлттық қорға қосымша кіріс түседі деп күтіліп отыр.
«Қазір Ұлттық қорда 55-56 миллиард доллар бар», — деді министр.
